Gidaghanon sa mag-jogging ug walking sa CCSC nisaka

Cebu, Philippines — Hinay-hinay na nga nidaghan ang mga tawo nga mag-jogging ug walking sa track oval diha sa Cebu City Sports Center sukad kini giablihan niadtong nilabay’ng Lunes.

Matud ni Jundel Bontuyan, manager sa CCSC nga sa unang adlaw nga pag-abli sa CCSC niabot ngadto sa 400 ka tawo ang nag-jogging ug walking gikan kini sa alas 5:00 sa buntag hangtud na sa alas 8:00 sa gabii ug sa ikaduhang adlaw nisaka ngadto sa 700 ang gidaghanon sa tawo.

Nasayran nga ang entrance sa CCSC P15 sa buntag ug P20 sa hapon ug matud usab ni Bontuyan nga sa pagkakaron ang kita sa CCSC igo ra kining isweldo sa mga tawo     nila.

Sa pag-abli og balik sa CCSC wala ra hinuon sila’y nasugatan nga kakulian tungod kay ang mga tawo nga moanha sa lugar mopatuo dayon kini inig badlongon sa marshals.

Giklaro ni Bontuyan gitugotan nila nga molingkod sa kilid sa track oval apan hangyo niya nga dili lang dugay aron paghatag og higayon usab sa uban nga maka jogging ug walking sa track oval.