CEBU, Philippines — Alang kang Governor Gwendolyn Garcia sa Probinsiya sa Sugbo personal nga desisyon sa usa ka indibidwal kon kini magpabakuna o dili batok sa COVID-19.
Bisan og nisuporta siya sa vaccination program sa gobiyerno apan dili pa siya makapadayag kon magpabakuna ba siya karon o dili.
“As it is, I think it’s premature for me to answer that. Ang ako lang kato lang unta gipang-prioritize maoy atong unahon”, matud ni Garcia.
Sa Probinsiya sa Sugbo, ang unang local chief executive nga nagpabakuna si Mayor Elanito Peña sa Lungsod sa Minglanilla.
Ang ubang mga mayor nipadangat og interest sama ni Madridejos Mayor Salvador Dela Fuente kinsa nipadayag nga wala usab siya’y pili sa brand sa bakuna nga iturok kaniya.
Laing bahin, human nakadawat og 9,000 doses sa Sinovac vaccine niadtong Biyernes sa gabii gikan sa Department of Health-7 gipadayon sa Cebu City government ang vaccination sa senior citizens diha sa tulo nila ka vaccination sites kagahapon.
Kini naglangkub sa SM Seaside City Cebu, Robinson’s Galleria ug University of Cebu Senior High School Building Banilad Campus.
Samtang si Konsehal Dave Tumulak, usa sa mga cluster head sa vaccination program niawhag sa publiko nga naa sa priority group A3 alang sa COVID-19 vaccination nga magprehistro sa online.
Human sa usa ka semana nga pagsuspenso sa pagpamakuna, ang Dakbayan sa Talisay mobalik na kini karong adlawa tungod kay aduna nay naabot nga dugang 300 ka vials sa Sinovac vaccine.
Si Dr. Lino Alanzado, pangulo sa City Health Office nagkanayon nga prayoridad gihapon nila ang frontliners apan moturok usab sila og mga senior citizen. Decemay P. Padilla, Sanden J. Anadia ug Gabriel C. Bonjoc/BDB (BANATNEWS)