CEBU, Philippines — Gi-imbentaryo na sa buhatan sa Mandaue City Treasurer's Office (CTO) ug sa buhatan sa Commission on Election (COMELEC) ang mga ballot boxes isip kabahin sa pagpangandam sa umaabot 2022 lokal ug national elections.
Si Julia Ballesteros, assistant city treasurer sa Dakbayan sa Mandaue, miingon nga ilang gisugdan ang pag-inventory sa maong mga ballot boxes niadto pang Abril 24, 2021.
Suma pa usab ni Jacqueline Reuyan assistant election officer sa maong dakbayan nga base sa COMELEC memorandum nga ang gigamit niadtong 2019 election mao lamang ang mahimong balikon sa paggamit sanglit bag-o pa kining tan-awon kon itandi sa mga ballot boxes nga gigamit niadtong 2013 ug 2016 election.
Dugang pa ni Reuyan nga ang dakbayan adunay 244 ka mga ballot boxes niadtong 2019 elections ug 80 porsyento lang niini ang mahimong ma-recycle.
Samtang giangkon sa Commission on Election (COMELEC) sa Dakbayan sa Talisay nga menos pa gyud ang ilang natala nga bag-ong nagparehistro sa unang kwarter ning tuiga.
Si April May Gamboang, election assistant sa Talisay City nitataw nga naa lang sa dos mil ka bag-ong botante ang ilang naproseso.
Base sa ilang eskedyul karong Septembre 30 na ang deadline alang sa pagdawat og bag-ong magparehistro.
Una niini, gi-imbentaryo na usab sa comelec sa Talisay ang mga balota niadtong miaging semana. Miabot sa 151 ka kahon sa balota ang ilang napanglantawan nga magamit pa sa piniliay sunod tuig. —Gabriel C. Bonjoc/MEL (BANATNEWS)