CEBU, Philippines — Laing duha ka food delivery drivers ang nabiktima sa mga tawong walay lingaw ug nag-order og pagkaon nga mokabat P5 mil kada usa nga gi-address diha sa Lapu-Lapu City Hall niadtong Miyerkules sa gabii.
Ang maong mga food delivery drivers midangop kang Lapu-Lapu City Mayor Junard “Ahong’ Chan kinsa mimando sa IT department sa siyudad pagsusi sa mga numero sa mga nag-order sa maong mga pagkaon.
Igo nalang nagpangalot sa ilang ulo dala kaguol ang duha ka drayber tungod kay nahulog ra sa wala ang ilang tibuok adlaw nila nga kinitaan.
Nasuta nga ang mga cellphone numbers nga gigamit gikan sa gawas sa nasud apan nigamit sa address sa ikawalong andana sa Lapu-Lapu City Hall. Apan ang edipisyo sa city hall kutob ra duha ka andana.
Tungod niini, gipasidan-an ni Chan ang mga food delivery drivers nga dili modawat og order kun ang numerong gigamit gikan sa gawas sa nasud ug kun makaduda ang pangalan ug address nga padad-an sa order. —IBM (BANATNEWS)