CEBU, Philippines — Koordinasyon. Mao kini ang gipangita ni Cebu City Mayor Edgardo Labella sa kadagkoan sa Department of Public Works and Highways (DPWH)-7 mahitungod sa ilang plano nga pagtukod og mga proyekto ubos sa hurisdiksyon sa siyudad.
Giklaro hinuon sa mayor dili tungod kay supak siya niini tungod kay kung makaayo ug mas daghan ang makabenepisyo iyaha pa gyud kining suportahan tungod kay makapalambo man sa siyudad.
Sumala pang Labella kinahanglang dunay tarong nga koordinasyon tali sa siyudad ug sa DPWH sa mga proyektong buhaton sa nauwahi, apan sa pagkakaron, wala pay opisyales sa maong departamento nga nakigatubang kaniya ug sa konseho sa siyudad.
Nabalita na nga ang DPWH-7 nakigtigom ug naghimo na og konsultasyon sa mga tagiya sa mga maapektahang establisamento sa proyekto.
Si Labella miingon angay unta nga gikonsulta sab sila bahin sa proyekto aron nga maapil ang ilang habig ilabi na kabahin sa Detailed Engineering Design sa mga proyektong tukoron.
Samtang si Bise Mayor Michael Rama sa iyang bahin, kinahanglan matud pa og seryosong pakisusi ang maong plano, apan kun siyay pabut-on mas pilion niyang gastohan sa gobiyerno ang pagpalapad sa mga kadalanan sa siyudad inay magtukod og mga flyovers.
Gani sa pagkakaron gikinahanglan na ang kooperasyon sa mga managsilingang siyudad aron planuhon ug tukion ang Comprehensive Integrated Traffic System.
Dugay na nga baruganan ni Rama sa dihang siya pay mayor sa siyudad nga dili gyud niya prayoridad ang mga flyovers kay mas gikinahanglan sa siyudad nga palapdan ang kadalanan niini.
Ang nahisgutang mga proyekto sa DPWH mao ang pagtukod og flyover gikan sa Osmeña Boulevard padung sa Leon Kilat Street, ug laing flyover sab sa N. Bacalso padung sa V. Rama Street ug underpass sab diha sa Cebu South Coastal Road padung ngadto sa Mambaling road junction. Ang consultancy firm nga “ CEDCO Engineers” maoy gikatahong mogama sa Detailed Engineering Design (DED) alang sa nahisgotan mga mga proyekto.
Moabot sa P105 milyones ang budget sa DPWH-7 alang sa paghimo sa DED nga gibanabanang mahuman sa bulan sa Agosto.
Samtang wala pa matino kun pila ang budget alang sa katukoran sa maong mga proyekto.
Nasayran nga dunay mga establisamento nga maigo sa pagpalapad unya sa mga dalan kun diin himuon kining maong mga proyekto. —IBM (BANATNEWS)