CEBU, Philippines — Dili mominos sa 26 ka panimalay nga kalab-anan ginama sa mga gaay nga materyales ang apektado sa pag-ulbo sa sunog sa may District 4, Barangay Pulpogan, Lungsod sa Consolacion kagahapon sa udto.
Ang sunog giingon nagsugod sa panimalay ni Corazon Abela base sa pasiunang impormasyong nahipos sa kabomberohan.
Ang sunog nagsugod alas 12:18 hingpit napawong alas 2:28 na sa hapon.
Wala hinuoy gikataho nga nakalas o naangol sa maong sunog nga gibana-bana nga nagbilin og danyos nga P300 mil.
Matud pa ni Fire Officer 1 Annalou Romano, Chief Admin sa Consolacion Police ang nitug-an nga ipaubos pa sa imbestigasyon ang hinungdan sa maong sunog.
Dugang pa ni Romano, ang kahagip-ot sa agianan nakabalda sa paspas unta nilang pagresponde. Sumala pa ni Romano, 32 ka mga households ang apektado.
Samtang si Consolacion Mayor Joannes Joyjoy Alegado ang nibisita sa lugar diin niulbo ang sunog hapon sa adlaw nga Lunes.
Nasuta sa mayor nga 35 ka pamilya ang apektado ug nipasalig nga andam motabang ang lungsod sa mga biktima sa sunog. —IBM (BANATNEWS)