Mayor Buscato miklaro nga dili ipaubos sa lockdown ang Santander
CEBU, Philippines — Gihimakak sa Mayor sa Lungsod sa Santander nga ipaubos sa lockdown ang ilang lungsod atol sa kapistahan sa Patron nga si Snr. San Gabriel Ankanghel karong bulan sa Abril.
Nakaabot sa atensyon ni Mayor Marites Buscato ang hugon-hugon nga ilockdown ang lungsod atol sa kapistahan, butang nga iya kini gihimakak. "Ako kini nga gipahibalo kaninyo nga usa kini ka fake news, wala kini kamatuoran nga wala ako nagpagawas sa maong kamandoan," matod ni sa pamahayag ni Buscato.
Giawhag hinoon sa Mayor ang mga residente sa lungsod nga padayon mosunod sa minimum health standard protocols. "Alang sa mga magpista nga tagbalay, inyo na kining risgo kung kinsa ang inyong mga bisita. Kamo na usab ang responsable sa pag-kontrol sa mga tawo" dugang ni Buscato.
Nasayod ang Mayor nga usa kini ka hagit ug risgo sa ilaha hilabina nga padayon nga naninguha nga dili mosaka ang kaso sa COVID-19 sa lungsod.
"Isip inahan sa lungsod, akong gihangyo nga magpaka-responsable kitang tanan," matod ni Buscato. —MEL (BANATNEWS)
- Latest
