CEBU, Philippines — Gihingosgan karon sa Visayan Electric Company (VECO) ang ilang kampaniya ngadto sa katawhan nga likayan ang pagpalupad og tabanog diha doul sa mga linya sa kuryente aron malikay sa disgrasya.
Matud sa reputation enhancement manager sa VECO Queenie Bronce nga gawas sa disgrasya ang masangit nga tabanog ngadto sa wire makahatag usab og problema diin usa kini sa hinungdan sa pagkapalong o pagkaputol sa supply sa kuryente.
Ang mga tinun-an nga naka-online class ingon man usab ang mga naka-“work from home” ang maapektohan kong mapalong ang kuryente.
“Wala man sad ta mag-ingon nga dili sila magtabanog. Apan kon magtabanog man gani sila kinahanglan adto sa lugar nga layo sa kuryente”, matud ni Bronce.
Si Bronce niawhag sa publiko nga kong ugaling adunay masabod diha sa mga linya sa kuryente kinahanglan nga itawag kini sa ilang buhatan aron matangtang sa ilang personnel paglikay sa disgrasya sa mga tawo. —BDB (BANATNEWS)