Kalihokan sa Cebu City Fire Office gikanselar

CEBU, Philippines — Ang mga kalihokan sa Cebu City Fire Office ang gikanselar atol sa pormal nga pagbukas sa 2021 Fire Prevention Month kagahapon human nga adunay mga personnel sa ilang buhatan ang na-exposed sa nagpositibo sa COVID-19.

Base sa report nga adunay 12 ka personnel nga mopaubos na unta og training ang nagpositibo sa swab test.

Ang pagpaubos sa swab test maoy usa sa ilang mga rekisitos sa ilang pagsulod sa training center.

Ang direktor sa Cebu City Fire Office Chief Inspector Josephus Alburo nipadayag nga kontrolado ang tanan ug walay ikabalaka ang publiko diin ang mga na-exposed nga personnel wala may gipamati ug kakulian sa ilang panglawas.

Ang maong mga personnel naka-confine kini diha sa quarters hangtud nga ang uban nilang mga kauban mapaubos sa swab test ug magpabilin kini sa quarters hangtud usab nga mogawas ang ilang resulta.

Gipahibalo usab ni Alburo ngadto sa publiko nga padayon gihapon ang ilang paghatag og serbisyo sama sa pag-process sa mga aplikasyon aron masusi ang mga establisamento ug modawat usab sila sa mga bayad alang sa fire safety inspection fee ug uban pa. Gipasalig usab sa kabomberohan nga andam gihapon sila nga moresponde kong adunay mga sunog nga mahitabo ug mohangyo usab sila sa publiko nga magmatngon sa kanunay aron malikay sa sunog ilabi na karong panahon nga nagsugod na usab ang ting-init.

Samtang ang Dakbayan sa Talisay nibukas kini sa fire prevention month kagahapon.

Ang kabomberohan sa siyudad nagkanayon nga giisip nila nga usa ka dakong hagit ang pandemiya.

Si Fire Inspector Arnel Abella, fire marshal sa siyudad nagkanayon nga usa sa ilang kawani ang nagpositibo sa COVID-19.

Hinuon na-isolate na kini sa wala pa nigawas ang iyang resulta sa swab test.

Base sa talaan sa kabomberohan sa siyudad sa tuig 2019 aduna silay natala nga unom ka insidente sa sunog gikan sa buwan sa Enero hangtud sa Marso apan nikunhod kini sa tuig 2020.

Ang kabomberohan sa siyudad nagpahigayon og motorkada kagahapon sa buntag aron pagpahibawo sa katawhan nga mag-amping kanunay aron kalikayan ang sunog. Gabriel C. Bonjoc/BDB (BANATNEWS)