CEBU, Philippines — Gikompirmar ni Lapu-Lapu City Mayor Junard Chan nga nagpositibo sa coronavirus disease 2019 ang siyam ka mga kawani sa Lapu-Lapu City Health Department (LCHD).
Una niini, gipahiblo ni Chan nga ang iyang igsoon nga si Grace Chan Carunggay, ang pangulo sa City Epidemiology and Surveillance Unit (CESU) sa maong dakbayan napositibo sa maong virus.
Apan human sa gihimong contact tracing ug swab testing sa mga kawani, usa ka nurse, usa ka utility worker, duha ka mga driver ug upat ka mga contact tracers nga gi-hire sa buhatan sa Department of Interior and Local Government o DILG ang positibo sab diay sa maong virus.
Si Chan miingon nga ang nagpositibo kasamtangan karon nga gipahiluna sa isolation facility sa Lapu-Lapu City College (LCC) gawas lamang kang Carungay nga gipahiluna karon sa usa ka pribadong tambalanan human masuta nga nagbaton kini og mga sintomas sa virus sa pag-ubo, sip-on ug naglisod usab sa pagginhawa.
Sumala pang Chan, mao kini ang nag-unang hinungdan nga gikanselar una ang pagpahigayon unta og vaccination simulation nga gikatakda unta niadtong Perbrero ‘24, 2021.
“Wa sa nato gilahos. Ang usa sad ana, most of our health workers karon are nag-suffer ani sa COVID-19, “ matud pa ni Chan. —IBM (BANATNEWS)