Rama andam magpaturok og bakuna gikan sa China
CEBU, Philippines — Sugdan na ugma, Biyernes, ang pagpahigayon sa konseho og marathon sessions nga molungtad sunod semana kun diin magtuki kini sa pagpalit sa siyudad og COVID-19 vaccine.
Gipahibawo ni Bise Mayor Michael Rama nga apil na usab sa ilang gipilian karon mao ang produkto sa China nga Sinovac nga bag-ohay lang nakakuha og Emergency Use Authorization sa Food and Drug Administration (FDA).
Gitataw sa mayor nga andam siya nga magpaturok sa maong brand sa vaccine.
Hinoon sa pagkakaron wala pa gyud matino kun unsa nga brand sa vaccine ang unang maabot sa nasud.
Nanawagan ang bise mayor sa katawhan nga angayan gyud hatagan og pagtagad ang pagpa-bakuna kun mosikad na kini dinhi sa siyudad.
Una na niya nga gibutyag nga dili pa matino kun kanus-a mahitabo ang pag-palit sa siyudad sa vaccine sanglit nagpadayon pa ang lapad nga pagtuon niini.
Usa sa gipangandaman karon sa siyudad ang pag-identify alang sa mga prayoridad sa vaccine sama sa medical practitioners, senior citizens, mga kabus ug uban pa.
Mihimo usab og konsultasyon si Rama sa nagkadaiyang representante sa barangay, pipila kanila ang nipadayag nga okay sila sa bisan unsa nga brand sa vaccine basta aprobado lang gyud sa Food and Drug Administration (FDA). —MEL (BANATNEWS)
- Latest
