CEBU, Philippines — Desidido nga mopasaka og kaso ang duha ka vendor sa Talisay nga giingong gikulata sa mga sakop sa taskforce nga gitahasan sa road clearing sa maong siyudad.
Si Baby Jene Auditor, 34 anyos nga taga Barangay Dumlog nagkanayon nga nanakit ang iyang kalawasan gumikan sa iyang na-angkon nga mga bun-og apan bisan pa niini naningkamot siya sa pagkuha sa resulta sa iyang eksaminasyon sa tambalanan aron makapasaka na sila og kaso.
Gibana-bana nga naa sa unom ka mga sakop sa task force sa Dakbayan sa Talisay ang mapasakaan og kaso nga physical injury sa magsuon nga namaligya og prutas nga giingong ilang gikulata niadtong Lunes sa hapon.
Una niini, si Baby Jene uban sa iyang igsuon nga si Jaydel, 33 anyos nga taga Barangay Tapul namaligya og prutas kilid sa karsada gamit ang traysikad. Apan naabtan sila sa task force nga nagpatuman sa road clearing operation hinungdan nga gisakwat ang ilang baligya.
Nisuway og pugong dala hangyo ang magsuong tindero apan didto na nitumaw ang lamok-lamok.
Samtang si Police Lt. Col. Gerard Ace Pelare, pangu sa Talisay City Police Station niingon nga dakung hagit ngadto kanila nga tigpatuman sa balaud ang paghatag og taas nga pasensiya panahon sa ilang operasyon. —MEL (BANATNEWS)