CEBU, Philippines — Giusad sa kagamhanan sa Dakbayan sa Toledo, pinaagi sa ilang City Veterinary Office ang lapad nga vaccination program alang sa kahayopan.
Ang maong proyekto gitawag og Barangay Alagad sa Kahayopan Program. Base sa report sa Toledo City Public Information Office, gibakunahan na ang 329 ka mga iro ug 18 ka iring. Ang CVO gidumala ni Dr. Nelce Garton ug gisugdan ang kampanya niini didto sa Bato, Toledo City.
Moabot usab og 173 ka nagkadaiyang hayop ang gipaubos sa hemorrhagic septecimia vaccination.
Giapod-apod usab ang mga bitamina alang sa mga kabaw, kanding og uban pa.
Gipaabot nga dugangan pa ni Toledo City Mayor Marjorie Piczon-Perales ug sa mga konsehal ang mga programa alang sa saktong pag-timan sa kahayopan.
Nasayran nga naandan na nga programa sa kagamhanan sa Toledo ang pagpamakuna ngadto sa mga hayop aron maseguro nga malayo kini sa mga sakit. Nasuta nga ubay-ubay ka mga indibidwal sa Toledo ang regular nga nag-atiman og mga hayop. —MEL (BANATNEWS)