CEBU, Philippines — Gisugdan na sa sa kagamhanan sa Lungsod sa San Remigio ang programa niini nga mao ang Caravan of Services diin tumong niini mao ang pagpadoul sa mga nag unang serbisyo sa gobyerno ngadto sa katawhan.
Miabag usab sa maong programa ang pipila ka ahensya sa gobyerno sama sa Department of Social Welfare and Development (DSWD), Philippine National Police (PNP), Department of Agriculture (DA), Bureau of Fire Protection (BFP) ug uban pa. Ang unang lugar nga gibisita niini mao ang Barangay Bagtik nga nahimutang sa bukirang bahin sa maong lungsod.
Gikalipay og maayo sa mga residente ang pagbisita sa lokal nga kagamhanan ngadto sa ilang dapit bisan og halayo ang ilang nahimutangan.
Base sa advisory sa Lungsod sa San Remigio, ang maong paghatag og serbisyo publiko sa katawhan mahitabo matag Miyerkules.
Bisan unsa pa ka layo, target sa caravan ang tanang 27 ka mga barangay sa maong lungsod. Matud pa nga tipik kini sa mga Programa og Agenda ni Mayor Mariano R. Martinez. —MEL (BANATNEWS)