CEBU, Philippines — Mahatagan na og nagkalain-laing benepisyo ang mga solo parent sa Dakbayan sa Talisay.
Kini human naaprubahan na sa konseho ang ordinansa kalabot sa pagtabang sa mga nag-inusarang ginikanan nga mibuhi sa ilang mga anak.
Si konsehal Marietta Bucao, chairman sa Family, Women and Children maoy nipapasar niini sa hawanan sa konseho atol sa ilang regular nga sesyon.
Sa maong ordinansa, ang mga solo parent makadawat og tertiary scholarship program, basic education sa ilang mga anak, housing ug medical assistance, livelihood ug daghan pa.
Nasayran miabot na sa 6 mil ang na-rehistro nga solo parent sa Dakbayan sa Talisay.
Samtang hatagan og prayoridad nga makadawat sa benepisyo mao kadtong nagparehistro.
Gipasabot ni Bucao nga dili pa lang sila makahatag og pinansyal nga hinabang gumikan kay naglisod pa sab ang siyudad sa ilang pundo gumikan sa pandemya. —MEL (BANATNEWS)