Lapu-Lapu police gimanduan sa hugot nga pagpatrolya
CEBU, Philippines — Gimando ni Mayor Junard Ahong Chan sa kapolisan sa Lapu-Lapu City Police Office (LCPO) ang hugot nga pagpatrolya ug sa pagronda sa mga publikong dapit alang sa gipahugtan pa nga pagpatuman sa minimum health protocol nunot sa pagsaka sa bag-ong kaso sa coronavirus disease 2019 sa Dakbayan sa Lapu-Lapu.
Lakip sa mando ni Mayor Chan mao ang pagsikop niadtong maaktuhan nga wa magsul-ob og face mask, wala magdala og quarantine pass ingon man kadtong wala mosunod sa gipatuman nga social distancing.
Gipahibawo sa mayor nga estrikto usab ang pagpatuman sa curfew ordinance ug number coding sa mga sakyanan ug quarantine pass.
Ang even number o pares nga katapusan nga numero ang gitugotan lamang sa paggawas sa Martes, Huwebes ug Sabado, samtang ang add number o bungkig nga numero ang gitugotan usab sa paggawas sa Lunes, Miyerkules ug Biyernes.
Gipasabot ni Chan ang mga Oponganon nga anaa pa gihapon ang COVID- 19 hinungdan nga dili angayan nga mokompyansa. Gitataw niya nga sa bulan sa Disyembre sa miaging tuig ang dakbayan wala na makatala og kaso sa COVID 19 apan niining bulan sa Enero daw namatikdan ang pagsaka na usab sa mga bag-ong kaso
Apil sa gimanduan ni Mayor Chan mao ang mga sakop sa City Disaster Risk Reduction and Management Council (CDRRMC) nga padayonon ang pagmonitor sa mga public beach sa dakbayan alang sa pagsiguro nga mapatuman ang 50 porsiyento nga capacity. —MEL (BANATNEWS)
- Latest