Nagpatay ni Wee niangkon

CEBU, Philippines — Nikompisal na ang usa sa gitumbok nga mamumuno ni Atty. Joey Luis Wee ug nitumbok sa usa ka retiradong opisyal sa Philippine Army isip utok sa krimen.

Si Fausto Edgar Benigno Peralta, 55, lumad nga taga Ilocos, niangkon nga siya maoy nagpusil patay ni Wee niadtong palis sa Nobiyembre 23, 2020 sa gawas sa opisina niini sa Barangay Kasambagan, Cebu City.

Iyang kauban atol sa pagpamusil mao si John Raymond Suarez.

Si Peralta nga usa sab ka kanhi sakop sa Philippine Army niangkon nga gihasol siya sa iyang konsensiya hinungdan nga niluwat og judicial affidavit aron angkonon ang krimen.

Sa iyang 30 ka pahina nga affidavit, gitumbok ni Petalta si retired Lt. Col. Edwin Layese nga maoy nagsugo nila pagpatay ni Wee.

Matud ni Peralta nga iyang mga kauban sila si Suarez nga nagsilbi niyang back-up, Randy Palparan, ug laing duha pa nga wala niya mailhi ang mga pangalan. Sila pulos na nag-atubang og kasong murder.

Sigun ni Peralta, P400 mil maoy ilang kontrata pagpatay ni Wee ug sa iyang asawa. Matud ni Peralta nga apil gyud unta ang asawa sa ilang patyon apan nausab ang plano ni Layese.

Sumala pa ni Peralta nga si Suarez maoy nagkontak niya alang sa maong trabaho samtang si Palparan nga maoy kontak ni Suarez mao say dunay kontak ni Layese.

Matud ni Peralta nga gihatagan sila og P60 mil nga down payment samtang ang balanse gihatag human nila napatay si Wee. Wala masayud si Peralta unsay atraso ni Wee apan giingon nga gihulagway kini ni Layese nga “maldito.”

“Sabi lang po marami daw atraso at ‘maldito’ daw po. Basta ang utos ni Col. Layese ay seguraduhin na patay si Atty. Wee hindi bale maraming bala basta seguradong patay,” nagkanayon ang affidavit ni Peralta.

Atol sa iyang pag-anhi sa Sugbo uban ni Suarez gikan sa Ilocos, gihikay na’ng daan ang ilang kinahanglan nga mga papeles sama sa medical certificate ug certificate of acceptance gikan sa local government unit.  Giandaman sab sila og kwarta sa usa ka pension house didto sa Mandaue City. Ang ilang tanang gamit, lakip na sa pusil, giingong gihatag nila ni Palparan.

Si Peralta nitug-an nga gawas ni Wee sila sab maoy responsable pagbanhig ni Atty. James Joseph Gupana sa Barangay Pajac, Lapu-Lapu City niadtong Oktubre 10, 2020. Si Gupana wala namatay atol sa maong pagpamusil.

Giingong personal nga atraso ni Layese maoy motibo sa pagtinguha unta niini pagpatay ni Gupana.

Samtang giangkon ni NBI regional director, Atty. Rennan Augustus Oliva, nga anaa na sa ilang kustodiya si Layese. Nagdumili pa siya paghatag og detalye sa pagkasikop niini sa niaging semana sanglit pormal siya nga ipresentar sa media karong buntag. Hinuon gikompirmar ni Oliva nga si Layese usa ka retiradong opisyal sa Army. Naghupot siya sa ranggo nga Lieutenant Colonel ug nigradwar sa Philippine Military Academy niadtong 1994.

Nagsilbi sab siya nga kanhi regional director sa Philippine Drug Enforcement Agency (PDEA-6) sa wala pa mataktak sa serbisyo niadtong 2012 tungod sa kakuwang og eligibility. —The Freeman