Cebu, Philippines — Sa labing unang higayon ang mga magtutudlo sa nagkadaiyang tunghaan sa Dakbayan sa Lapu-Lapu molakip na sa ilang pagtudlo ngadto sa ilang mga tinun-an kabahin sa makasaysayanong kadaugan ni Datu Lapu-Lapu.
Kini gitumong sa tuyo nga kahatagan usab og katin-awan ug mapasabot sa mga tinun-an ang kinaiya ug kultura sa katawhang Pilipinhon sa wala pa midangat ang mga katsila dinhi sa sugbo.
Si Cindi Chan nga maoy pangulo sa Lapu-Lapu City Tourism, Cultural and Historical Commission (CHAC) ang naghisgot labot niini sa iyang open letter ngadto sa mga tinun-an sa dakbayan.
Gitinguha ni Chan nga i-apil kini sa pagtudlo sa mga tinun-an pinaagi sa module aron masilsil sa ilang mga hunahuna ang bayanihong buhat ni Lapu-Lapu nga maisogong nakig-away batok kang Magellan.
Ang Department of Education DepEd Lapu-lapu City Division uban ang kagamhanan sa Dakbayan sa Lapu-lapu milusad niining maong programa sa tinguha nga ma-edukar niini ang mga tinun-an.
Gigahinan og pundo sa Lapu-lapu city government ang pag-imprinta sa nahisgutang modules. (BANAT NEWS)