Pista sa Santa Fe walay kalihokan nga ipahigayon

CEBU, Philippines — Walay kalihokan nga ipahigayon ang lungsod sa Santa Fe, Isla sa Bantayan sa umaabot nga kapistahan ni Senior Santo Niño karong Enero 15 hangtud 16, 2021.

Pamaagi kini sa lungsod aron malikayan ang panagtapok nga mahitabo nga mao unya ang hinungdan sa pagkatap sa COVID-19.

Si Mayor Ithamar Espinosa niawhag sa mga Santafehanon nga padayong mosunod sa health protocols aron malikayan ang pagtakod sa COVID-19

"Kung mahimo, likayan usab ang pagpundok-pundok aron sa ingon mas menos ang tsansa nga kita makaangkon sa maong virus”, awhag ni Espinosa.

Nag-andam hinuon ang lungsod sa pagbisita sa imahen ni Senior Santo Niño sa ilang lugar.

Hinuon wala pay tukmang petsa nga gikatakda sa pagbisita sa imahen. —BDB (BANATNEWS)