Labella: Pagpasulod sa mga TPUJs sa siyudad kinahanglan na

CEBU, Philippines — Nakita ni Cebu City Mayor Edgardo Labella nga kinahanglan na pasudlon ang mga Traditional Public Utility Jeepneys (TPUJ) gikan sa ubang mga lugar sama sa Mandaue, Talisay ug Lapu-Lapu City dinhi sa Siyudad sa Sugbo.

Kini human iyang na-obserbahan nga daghan kaayo ang pasahero panahon sa peak hours ug kuwang kaayo ang mga sakyanan.

Gipaabot nga sa kataposang bahin ning buwana mopagawas si Mayor Labella og Executive Order aron maghatag og pagtugot sa mga TPUJ sa ubang lugar nga makasulod na sa Cebu City. Si Mayor Labella miingon nga iyang tan-awon ang pagtuon nga gihimo sa Cebu City Jeepney Task Force nga gipanguluhan ni Konsehal James Anthony Cuenco.

Ang mayor nakadayeg hinoon sa trabaho nga gihimo ni Cuenco may labot sa transportation sa dakbayan tungod kay nahatagan og pagtagad ang reklamo sa mga jeepney drivers nga nawad-an sa ilang panginabuhian. —MEL (BANATNEWS)