CEBU, Philippines — Gilauman ang pagpalambo sa mga ginagmay nga patigayon sa Dakbayan sa Mandaue nunot usab sa tinguha sa lokal nga kagamhanan nga pagtabang pinaagi sa ilang gilusad nga Mandaue Investment Promotions Action Center (Mipac) nga gitawag og mentoring system alang sa 26 ka kaugalingong ginama nga mga produkto. Sa kasamtangan giila sa Mipac ang 26 ka kaugalingong produkto sa dakbayan diin lakip niini ang serbisyo ug ginagmay nga patigayon isip kabahin sa ilang gitawag og Tatak Mandaue 2020. Gitinguha sa Mipac nga malambigit ngadto sa dakong matang sa patigayon ug pagsagop sa ilang gihimo. Si Marc Cabahug, executive director sa Mipac nagkanayon nga usa sa ilang tinguha karon mao ang pagpalambo sa tanang matang nga patigayon sa dakbayan.
Giaangkon niya nga daghan sa mga dagko ug gagmay nga patigayon ang naapektohan sa nasinati nga pandemiya.
Giangkon ni Cabahug nga tungod sa COVID-19 daghang magpapatigayon ang napugo sa pag-shutdown sa ilang negosyo.
Dugang ni Cabahug nga pinaagi sa Mipac ilang pagahimuon ang pagtabang alang sa pagbukas og balik sa mga negosyo ug mosaka pagbalik ang kitaon sa merkado sa mga gimugna nga kaugalingong produkto. (BANATNEWS)