Cebu, Philippines — Nadakpan sa gipahigayon nga hiniusang entrapment operation sa Women and Children Protection Desk sa Cebu City Police Office ug ubang ahensiya sa gobiyerno ang usa ka YouTube Vlogger tungod sa pag-upload niini og sex video sa usa ka porn site.
Ang suspek nga si Juvan Lloyd Tumlos, 30, taga Ucma Village sa Barangay Lahug ning dakbayan gidakop niadtong Biyernes sa gabii diha sa Salinas Drive, Barangay Lahug sa Cebu City.
Matud pa ni PLt. Col. Stephen Daang, pangu sa Investigation and Detection Management Unit (IDMU) midangop sa WCPD ang 17 anyos nga babaye ug mipasangil sa suspetsado nga mi-upload sa ilang sex video ngadto sa usa ka porn site. Ang maong mga sex video matud pa gibaligya sa suspetsado ngadto sa maong porn site.
Tungod sa kauwaw ug kabalaka sa biktima nidangop kini sa kapolisan hinungdan sa gipahigayong operasyon ug naaresto ang suspek.
Kasong kalapasan sa Sec 4(a) RA 9206 as ammended by RA 10364 “The Expanded Trafficking in Person Act.” Ang suspek kasamtangan karong gibalhog ang suspetsado sa Cebu City detention cell. ( BANAT NEWS)