Cebu, Philippines — Moabot ngadto kapin sa 1,400 ka mga kabus nga bata gikan sa 46 ka mga barangay sa Siyudad sa Sugbo ang makadawat og mga pinaskohan sunod semana sa programang gipasiugdahan sa kagamhanan sa siyudad ug sa Cebu City Progressive Uptown Movement (CCPUM).
Nasayran nga usa si Bise Mayor Michael Rama maoy usa sa mga nag-umol sa maong proyekto pila ka tuig na ang nilabay ug gitawag kini og “Pasko sa Uptown.”
Nagkanayon ang presidente sa CCPUM nga si Creslito Nieves nga tungod sa pandemiya wala na ang naandang Christmas party ug ang paghatag nalang og gasa maoy ilang gipabilin.
Sumala pa niya nga house-to-house ang distribusyon niini ug ang matag putos dunay bugas ug mga pagkaon.
Dugang pa ni Nieves nga ikaupat na kini ka tuig nga gihimo ang nahisgutang kalihukan uban sa kooperasyon sa mga opisyales sa barangay nga maoy nag-screen sa mga bata.
Sumala pa niya nga dunay mga establisamento ug mga pribadong tawo ang nagpaluyo sa paghatag og mga pinaskohan alang sa mga bata.
Tumong niini mao ang pagpaambit sa nadawat nga mga grasya ngadto sa ilang isi’g katawo.
“Panahon karon sa paghatag og kalipay sa kabataan , “ ni Nieves pa. (BANAT NEWS)