CEBU, Philippines — Usa ka ordinansahon ang giduso ni Konsehal Antonio Bacaltos Jr. nga magpahamtang og silot sa mga nagdumala og barko nga mag-angkorahe sa kadagatan sa Dakbayan sa Talisay.
Suma pa ni Konsehal Bacaltos nga gikinahanglan ang ordinansa aron ma-protehian ang kadagatan sa siyudad.
Lakip sa nalatid sa maong ordinansahon nga pabayron ang mga tag-iya og barko nga masangad sa mga korals og molabay og basura ug uban pang hugaw ngadto sa dagat.
Si Bacaltos kinsa maoy chairman sa Committee on Environment sa siyudad miingon nga daku usab kini og tabang sa mga mananagat aron mas modaghan pa ang ilang makuha nga isda ug ma-proteksyonan ang kadagatan.
Samtang si kapitan Edward Alesna sa Barangay Poblacion nakauyon sa maong tinguha.
Apan siya nanghinaot nga matagaan og ngipon ang balaod nga tinud-on gyud sa pagsilot ang mga makalapas sa ordinansa. —MEL (BANATNEWS)