Kawani sa Lapu-Lapu City Hall way madawat nga bonus

CEBU, Philippines — Walay madawat nga Christmas bonus ang mga kawani sa kagamhanan sa Dakbayan sa Lapu-Lapu karong tuig 2020.

Kini ang gipahibalo ni Mayor Junard Ahong Chan niadtong miaging adlaw nunot usab sa daghan pa nga panginahanglan niining panahon sa pandemiya sa coronavirus disease.

Matud pa niya nga daghan pa nga panginahanglan maoy labing mahinungdanon nga pagahimoon.

"Kahibawo gyod ta nga kapos ta sa kuwarta, daghan pata og kagamitan nga mas importante nga mao ang panglawas sa atong kaigsoonan." nagkanayon si Mayor Chan.

Hinuon gitataw sa mayor nga kun moluwat og kamandoan si Presidente Rodrigo Duterte ngadto sa mga lokal nga kagamhanan sa paghatag og Christmas Bonus sa mga kawani wala siyay mahimo gawas lamang sa pagtuman niini.

Nunot niini si Mayor Chan mihangyo og pagsabot sa mga kawani sa city hall sa mao niyang hukom taliwala niining nasinati nga krisis sa panglawas nga epekto sa COVID-19.

Samtang gipaniguro usab niya sa mga kawani sa kagamhanan sa dakbayan nga madawat gihapon nila ang ilang 13th month pay ug gawas pa niana makadawat usab og lima ka kilong bugas ug ham ang matag kawani. —MEL (BANATNEWS)