45 ka armas nasakmit sa Minglanilla Police Station
CEBU, Philippines — Miabot sa 45 ka armas ang nasakmit sa kapulisan sa lungsod sa Minglanilla sud lang sa duha ka buwan gikan sa mga dinakpan ug sa mga tawong boluntaryo nga mitahan niini.
Si Police Captain Arvin Hosmillo, pangu sa kapulisan sa lungsod sa Minglanilla miingon nga kung wala pa sila gikwarantinas mas daghan pa unta ang ilang makumpiska nga armas.
Matud pa niya nga nakuha nila ang mga armas pinaagi sa ilang mga operasyon, Oplan Katok ug pagtahan sa mga armas sa mga tawo nga nanag-iya niini.
Ang mga armas gipresentar ngadto kang Police Col. Alladin Collado, direktor sa Cebu Provincial Police Office.
Si Hosmillo miingon nga ang pagkwarantina nila mas nakapalig-on sa ilang relasyon.
Siya nagtuo nga mas epektibo sila sa umaabot nga adlaw sa ilang gimbuhaton gumikan sa resulta sa ilang pagkwarantinas.
Sa nasayran, nagpositibo sa Covid-19 ang hepe sa kapulisan sa lungsod hinungdan sa ilang pagkwarantinas.— IBM (BANATNEWS)
- Latest
