156 ka polis ipakatap sa mga simbahan atol sa Misa de Gallo

CEBU, Philippines — Ang kapolisan higpit na kining nangandam alang sa umaabot nga Misa de Gallo nga ipahigayon matag kadlawon sulod sa siyam ka adlaw ug magsugod matag Disyembre 16 kada tuig sa dili pa ang adlaw sa pasko.

Gibutyag ni Police Lieutenant Colonel Clark Arriola, tigpamaba sa Cebu City Police Office nga sa buwan pa sa Oktubre nihimo na sila og mga preparasyon alang sa nagsingabot nga pasko.

Lakip sa preparasyon ilahang gituki ang gidaghanon sa mga parokya nga anaa sa Dakbayan sa Sugbo ug ang mga personnel nga gikinahanglang ipakatap.

Nasayran nga 35 ka parokya ang tutokan ug 156 ka police personnel ang ipakatap.

Gibutyag usab ni Arriola nga dili lang ang simbahan ang ilang bantayan lakip usab ang mga kadalanan diin adunay mga manimbahay ang mobiya sa ilang kabalayan.

Ang kapolisan makig-alayon kini sa kadagkoan sa lokal nga kagamhanan ug  simbahan alang sa pamaagi aron mapatuman gihapon ang mga minimum health standard.

“We will coordinate with city government and of course the church asa ilang halaran og misa, from there mo-adjust ta sa atong deployment and as always dili lang gyud ta puro sa simbahan lang kay of course from the residents mo-commute na sila, mo-travel na sila padong sa simbahan so butangan sab nato sila og deploymet”, ni pa.

Matud ni Ariola nga nagkinahanglan sila og tabang sa tanan aron matuman ang health protocols panahon sa Misa de Gallo. Makigtigom usab ang CCPO sa Parish Security Group (PSG) sa unang semana sa buwan sa Disyembre kini aron mahan-ay sa kapolisan ang ilahang deployment.

Panawagan sa CCPO sa katawhan nga magmatngon ug motuman sa basic health protocols. –Rowena D. Capistrano/BDB (BANATNEWS)