MANILA, Philippines — Gipahibawo ni Cebu City Mayor Edgar Labella nga mahuman na sunod buwan ang konstruksyon sa unang tulo ka andana sa bag-ong building sa Cebu City Medical Center.
Ang maong anunsyo sa mayor gipaabot nga ikalipay sa mga sugbuanon, gumikan kay posibleng magamit na ang maong pasilidad nga dugay na nga gipaabot sa mga taga siyudad sa sugbo.
Suma pa sa mayor nga sa unang hugna, langkoban kini sa outpatient department, wards, ug emergency room og posibleng dinhi usab ipahimutang ang radiology ug x-ray department.
Kalabot usab sa nikatap nga hulagway nga nagpakita nga dako pa kaayo og kulang ang CCMC , nidepensa si Mayor Labella nga kuha kini sa ika-unom nga andana sa building nga nalakip sa laing phase sa proyekto.
Langkoban og 10 ka andana ang CCMC ug una nga gibutyag kaniadto ni Bise Mayor Michael Rama nga target nila nga mahuman ang tibouk building sa dili pa mahuman ang ilang termino karong 2022.
Una na niya nga gibutyag nga magsilbi kini nga legasiya sa mga opisyales kun mahuman ang maong tambalanan.
Kahinumdoman nga gisugdan ang konstruksyon sa CCMC niadtong 2015 atol sa administrasyon ni Rama kinsa mayor pa niadtong tungora.
Gidemolis ang karaang CCMC building human nameligro ang istado niini gumikan sa 7.2 magnitude nga linog nga niigo sa Cebu niadtong 2013. (BANAT NEWS)