CEBU, Philippines — Laing tropical depression ang gibantayan karon nga mosud sa Philippine Area of Responsibility (PAR) ug gipaabot nga mamahimo kining bagyo.
Suma pa sa pangulo sa PAGASA Engr. Al Quiblat nga nahinabi sa Banat News nga gipaabot nga mosulod sa PAR ang bagyo nga panganlan og Rolly karong adlawa Huwebes. Base sa ilang forecast sa kinatibuk-an maayo ang dagan sa panahon karong adlawa apan dunay higayon sa pagpanogdog og kilat sa kahaponon.
Dugang pa ni Quiblat, sa gabii posibleng makamugna ug lumalabay nga kalit ug kusog nga ulan tungod sa localized TSTM diin ang kadagatan malinawon ngadto sa kasarangan nga pagbalod ug ang temperatura maggikan sa 25 ngadto sa 32 degrees Celsius.
Si Quiblat, nitug-an nga gikan sa Biyernes ngadto sa Domingo makasinati ug dag-om inubanan sa katag hinay ug kasarangan nga ulan.
sa maong mga adlaw masinati usab ang kusog nga ulan panahon sa kagabhion lakip ang pagpanogdog ug kilat.
Ang kadagatan sa maong mga adlaw kasarangan ngadto sa dagko nga pagbalod.
Awhag ni Quiblat sa katawhan nga kanunay magpaminaw sa lakat sa panahon. /MEL (BANATNEWS)