Mga biyahe sa barko temporaryong gisuspenso sa PCG

CEBU, Philippines — Ang Philippine Coast Guard Station Cebu temporaryong nisuspenso sa biyahe sa mga barko diin ang mga rota adunay storm signal tungod sa tropical depression Quinta.

Ang kamandoan base sa giluwatan nga notice to mariners ni PCG Commander (CDR) Alvin Dagalea sa, acting commander Coast Guard Station (CGS) Central Cebu.

Ang gisuspenso nga mga biyahe paingon sa Masbate, Quezon, Cavite, Bulacan, Occidental Mindoro, Bataan, southern portion sa Zambales, Metro Manila, Eastern Samar, northern portion sa Capiz ug northern portion sa Antique diin ang maong mga lugar parehong ubos sa signal no.1.

Gisuspenso usab ang mga biyahe paingon sa Northern Samar, Romblon, north portion sa Masbate, Albay ug uban pang lugar nga parehong ubos sa signal no.2.

Sa laing bahin, ang PCG niresponde sa maritime incident nga naglambigit sa cargo vessel nga M/V The Good Fortune nga nakasugat og problema sa makina diha tunga-tunga sa kadagatan sa Lungsod sa Ubay, Probinsiya sa Bohol ug Maasin, Southern Leyte kagahapon sa hapon.

Ang maong barko nibiya kini gikan sa pantalan sa Dakbayan sa Naga niadtong Sabado diin padulong unta kini ngadto sa Bicol.

Ang PCG command center nakadawat og report alas 4:00 sa hapon kagahapon gikan kang Ship Captain Charlie Jesus Sollegue sa MV the Good Fortune nga ang barko nakaangkorahe diha dapit sa President Carlos P. Garcia sa Bohol ug gipahigayon ang engine repair.

Ang 14 ka tripulante sa maong barko pareho kining luwas

Usa sa mga tripulante sa barko ang ni-post diha sa iyang social media page diin nagpakitabang kini human nisulod ang tubig diha sa barko dihang nakasugat kini og problema ug gihapak sila og dagkong balud. /BDB (BANATNEWS)