CEBU, Philippines — Duha ka pusher og shabu ang nadakpan sa buy bust operation sa kapolisan sa Barangay Buagsong sa Lungsod sa Cordova alas 10 pasado ang takna sa miaging gabii.
Si Police Captain Al-Nico Haman nga maoy bag-ong hepe Cordova Police Station maoy nangulo sa buy bust operation.
Ang mga nadakpan mao sila si Miguel Tiro, 20 anyos nga maoy nagtunol sa usa ka gamay nga putos nga shabu nga mobalor og P300.
Samtang ang kauban nga si Joshua Arong, 25 anyos nga taga Purok Inahan sa Kanunay'ng Panabang sa Barangay Buagsong ang nakuhaan usab sa kapolisan og dugang lima ka paketeng shabu. Ang duha ka mga dinakpan gitanggong na karon sulod sa detention cell sa Cordova Police Station ug gikatakdang pasakaan og kaso nga kalapasan sa Republic Act 9165 o Comprehensive Dangerous Drug Act of 2002. (CEBU NEWS)