CEBU, Philippines — Makigalayon ang Police Regional Office (PRO) -7 sa New Bilibid Prison (NBP) pagtino bahin sa report nga ang kombiktadong druglord nga si Rustico Ygot namatay na suds a maong bilanggoan tungod sa atake sa sakit sa kasingkasing.
Si Ygot nalambigit sa kinabag-uhang mga dinagkong transaksyon sa kinilong mga shabu nga nasakmit sa kapolisan sa Sugbo sa nanglabay nga mga semana.
Si Police Brigadier General Albert Ignatius Ferro, hepe sa PRO-7 nagkanayon nga ang kamatayon ni Ygot makapapiang sa mga transakyon sa Ygot Drug Group.
“If there’s no more leader it’s really hard (for them) to conduct further illegal drug operation and I think that particular druglord is the one that is being trusted by the triad and the drug syndicate that is outside the Philippines,” sigun ni Ferro sa mga tigbalita kagahapon.
Sa pagkasakmit sa mga kinilong shabu dinhi sa Sugbo sa nanglabay nga mga semana, giingong nasubay sa intelligence community nga si Ygot maoy nagpadagan sa mga transaksyon.
Si Ferro miingon nga ila sab gimonitor ang live-in partner niini nga si Jocela Encila kinsa gibansagang “Shabu Queen” human kini nadakpan Marso 3,2019 ug nakuhaan og kinilong shabu dinhi gihapon sa Sugbo. Gituohan nga siya maoy mopuli kang Ygot.
Si Ygot maoy gitumbok nga nagpaluyo sa transaksyon sa P47.6 milyones nga shabu nga nasakmit gikan sa tulo ka mga high-value individuals sa usa ka buy-bust operation diha sa Sitio Tipolo Bridge, Barangay Guadalupe, Cebu City kaniadtong Septiyembre 20,2020.
Si Ygot nakombikto kaniadtong 2013. Giingong namatay kini sa NBP niadtong Biyernes. /IBM (BANATNEWS)