CEBU, Philippines — Nahawan na gikan sa mga tindahan ang 14 sa 15 ka mga pangpublikong mga sam-ang sa Dakbayan sa Sugbo sumala pa sa hepe sa Cebu City Prevention, Restoration, Beautiful, and Enhancement (PROBE) nga si Raquel Arce.
Ang mga vendors na mismo maoy boluntaryong niguba sa ilang mga barong-barong ug tinda-tindahan hinungdan mga wala ray nahitabo nga komosyon.
Suma pa ni Arce nga subay kini kamandoan ni Mayor Edgardo Labella aron malikayan ang paghuot sa mga tawo nga moduaw sa ilang mga minahal sa kinabuhi nga nipanaw na ug pinasubay sab kini sa pagtuman sa mga health protocols aron malikayan ang pagkuyanap sa COVID19.
Una na nga gisaad sa siyudad nga hatagan og bugas ang mga mapeektohan nga vendors ug lakip na usab ang mga sepulturero. Malinawaon usab nga napatuman sa mga administrador sa mga sementeryo ang alas 6 sa buntag hangtud sa alas 6 sa gabii nga pagbukas niini.
Base sa monitoring sa PROBE sukad niadtong Septiembre 26, wala sila’y natala nga quarantine violators.
Nasayran nga sirado ang sementeryo gikan sa Oktubre 29 hangtud sa Nobyembre 4 hinungdan nga sa laing petsa gipaabot modagsa ang mga tawo sugod palang niadtong Septiyembre 26.
Nakabutang sa EO No. 92-A ang mandatory nga pagsul-ob og face mask , face shields ug ang pagdala og quarantine pass sa mga gustong mosulod sa sementeryo.
Ginadili usab nga mosulod ang mga senior citizens ug ang nag-edad og 21 anyos paubos. /IBM (BANATNEWS)