CEBU, Philippines — Miisyu na pud og Executive Order (EO) No. 094 nga nagpaubos sa tibuok dakbayan sa Modified General Community Quarantine sa tibuok buwan sa Oktubre.
Kasagaran sa unod niini gibase ra usab sa EO sa miaging buwan ug duna ray gamay nga kausaban.
Magpabilin gihapon ang pagpangabli sa naandan nga mga establisamento uban sa istrikto nga pagpatuman sa health protocols. Manukad gihapon ang curfew gikan sa alas 10 sa gabii hangtud sa alas 5 sa buntag.
Kinahanglan gihapon gamiton ang quarantine pass ug sundon ang odd-even schemes. Ang adunay code nga ang kataposan odd numbers (1,3,5,7,9) gitugotan nga mogawas sa adlaw sa Lunes, Miyerkules, ug Biyernes, samtang ang mga naghinapos og even numbers (2,4, 6,8,0) mahimong mogawas sa Martes, Huwebes, ug Sabado. Sa Domingo, dunay kausaban sanglit ang tanan nga tag-iya sa Q-Pass mahimo ng mogawas ug dili na basihan ang kataposang numero sa ilang QPass Codes.
Gitugotan na usab ang 24 oras nga food ug medicine delivery.
Gilibkas na usab ang liquor ban apan magpabilin gihapon nga sirado ang mga beer houses, night clubs ug mga bars. — Ruth Malinao/IBM (BANATNEWS)