Online rehab sa mga PDLs gipaila sa COSAP

CEBU, Philippines — Tungod sa pandemiya ug higpit nga pagpatuman sa physical distancing aron mapugngan ang pagkatap sa Covid-19 miumol og online rehab program ang Cebu City Office of Substance Abuse Prevention (COSAP) alang sa ilang mga kliyente.

Sa pagkakaron, adunay 997 persons deprived of liberty (PDLs) ang gipaubos sa rehab program sa COSAP.  Aron malikayan ang panagtapok , mopili lang ilang kliyente og modular o online nga mga session o seminar.

Matud pa sa hepe sa COSAP nga si Jonah John Rodriguez nga usa kini sa ilang pamaagi aron dili maghuot ang ilang mga kliyente diha sa ilang buhatan.

Adunay matag semana nga session o seminar sa mga PDLs.

“Padayon ang atong pag-evaluate karon kun unsa nga pamaagi ang ilang pilion. Pero dunay uban ang dili kaayo suhito sa  internet  o sa  modular, sila lang ang ipaubos nato sa face to face session,” sumala pa ni Rodriguez sa dihang nahinabi sa Banat News kagahapon.

Bisan paman sa bag-ong sistema , gisaad sa COSAP nga magpabilin ang maayong kalidad sa ilang mga session. /IBM (BANATNEWS)