71-anyos napaig sa sunog sa Balamban
CEBU, Philippines — Patay ang usa ka ginang human kini nalakip kapaig sa naugdaw niyang balay atol sa pag-ulbo sa sunog adlaw nga Lunes sa may Sitio Saksak, Barangay Abucayan, Balamban.
Ang nakalas naila nga si Estelita Deiparine, 71, paralisado ug residente sa maong lugar.
Nadawat sa kabomberohan ang alarma sa maong sunog alas 5:44 sa hapon ug giisa lang kini sa 2nd alarm ug nakontralar alas 6:10 na sa buntag.
Ang sunog miigo sa panimalay nga giingong gipanag-iya ni Jack Deiparine ug gibana-bana nga moabot ngadto sa P100 mil ang danyos. Wala hinooy gikataho nga naangol usab sa maong sunog gawas lang sa edaran nga nakalas.
Matud pa ni Police Master Sergeant Roldan Balingbing, sa Balamban Police Station, nakadawat og tawag ang ilang buhatan may kalabutan sa sunog, hinungdan dali usab nakaresponde ang ilang kapulisan alang sa crowd control uban sa pakig-alayon sa Bureau of Fire.
Sumala pa ni Balingbing, atol sa pagpahigayon og joint investigation didto nasayran sa anak sa biktima nga nagdagkot kini og katol aron sa pangontra sa lamok nga gibutang sa tiilan sa inahan ug nibalik kini sa gipuy-an niini aron magluto.
Giingong pipila ka gutlo mao nalang ang nadunggan sa anak sa biktima ang siyagit sa mga silingan nga sunog ug didto nakita nga naugdaw na ang gipuy-an sa tigulang nga ginama sa light materials.
Ang kapulisan ug kabomberohan padayon pa karon nihimo og imbestigasyon may kalabutan sa maong insidente. /IBM (BANATNEWS)
- Latest