CEBU, Philippines — Ang kagamhanan sa Dakbayan sa Mandaue nang-apod-apod og garbage truck ngadto sa 16 ka barangay sa siyudad diin sa niaging adlaw gipahigayon ang turnover ceremony niini diha sa Mandaue City Plaza.
Si Mayor Jonas Cortes maoy nangulo sa pag-apod-apod sa nahisgutang mga sakyanan ngadto sa mga opisyal sa 16 ka barangay.
Ang nahisgutang mga barangay gilangkuban sa Cabancalan, Cubacub, Jagobiao, Opao, Subangdaku, Tawason, Tingub, Umapad, Canduman, Banilad, Basak, Guizo, Ibabao, Maguikay, Mantuyong ug Pagsabungan.
Nasayran nga sa niaging bulan ang siyudad nanghatag sa unang batch sa mga garbage truck ngadto sa siyam ka barangay.
Nasayaran usab nga laing duha ka garbage truck ang ipanghatag usab sa siyudad alang a ikatulong hugna. Tumong sa kagamhanan sa siyudad nga mapalambo ang pagkolekta sa mga basura sa siyudad.
Ang Dakbayan sa Mandaue nga usa ka highly urbanized city gilangkuban kini sa 27 ka barangay. /BDB (BANATNEWS)