CEBU, Philippines — Gisugdan na kagahapon sa kadlawon sa Cebu City Transportation Office (CCTO) ang pagpintal sa giumol nga bike lanes sa siyudad.
Kahinumdoman nga nauso og samot ang pagbisikleta human gipahunong niadtong Abril ang pampasaherong sakyanan tungod sa community quarantine.
Dinhi naumol ang mga sugyot nga kinahanglan gyud ang bike lanes sanglit gamit kaayo kini ilabi na sa mga nagtrabaho.
Aron maklaro kini sa bikers, green ang gipintal niini ug dunay puti nga outline. Gisugdan na kini didto sa V. Rama Street nga usa sa mga busy kaayo nga dalan sa siyudad.
Nalakip sa gisugdan mao ang habig sa N. Bacalso Avenue ug M. Velez Street.
Suma pa ni City Attorney Rey Gealon nga dunay engineering department ang CCTO alang sa pagpreparar sa budget sa maong proyekto.
Napanglantawan usab nga tungod sa maong senaryo, mominos ang pulosyon.
Samtang sa laing bahin gituki usab sa konseho sa Dakbayan sa Mandaue ang ordinansahon nga naglatid og mga lagda alang sa bicycle system sa usa ka highly urbanized nga dakbayan.
Si Konsehal Jimmy Lumapas ang nangamahan sa maong balaudnon nga gi-certify usab ni Mayor Jonas Cortes nga mapadali.
Gipasabot sa konsehal nga gikinahanglan usab ang pagsul-ob og helmet ug reflectorized vests o bright-colored shirts sa mga bikers samtang kini magdagan diha sa kadalanan aron malikayan ang disgrasya. Romeo T .Limpangog/MEL (BANATNEWS)