CEBU, Philippines — Si Mayor Edgardo Labella nisaad nga sa dili pa mahuman ang buwan sa Septiyembre mahatag na ang cash incentives sa mga medical worker sa pampubliko ug pribadong tambalanan.
Ang maong medical workers gilangkuban sa mga doktor, nurse, medical technologist, ug uban pa nga trabahante sa tambalanan kinsa nadestino alang sa pagpakigbatok sa COVID-19.
Nasayran nga nikabat ngadto sa 2,000 ang nalakip sa listahan sa mga makabenipisyo sa maong incentive diin matag usa kanila gikatakdang makadawat og P10,000.
Si Labella nagkanayon nga dili lalim ang risgo sa medical workers busa makiangayon lang nga makadawat kini og cash incentives.
Gibutyag ni Labella nga taod-taod na ang maong sugyot apan nalangan ang pagproseso niini.
Ang siyudad mao pa kini ang unang higayon nga mohatag og cash incentives ngadto sa mga pribadong professional.
Giseguro sa kagamhanan sa siyudad ang paghan-ay sa mga guideline ug mga dokumento aron dili kini makwestiyon sa Commission on Audit (COA). /BDB (BANATNEWS)