CEBU, Philippines — Gikatakda sa kagamhanan sa Dakbayan sa Lapu-Lapu ang pagpasiugda og coastal clean-up isip kabahin sa gihimo nga pagpangandam sa pagbukas sa turismo nga nasirado sukad pa niadtong Marso 2020 tungod sa hulga sa coronavirus disease.
Kini salmotan sa mga diver nga naglakip sa mga sakop sa kapolisan sa maong dakbayan sa pagsiguro nga luwas ang kadagatan alang sa pagsuroy sa mga dumoduong ug langyaw nga turista.
Si Mayor Junard Ahong Chan miingon nga ilang gisiguro nga luwas sa COVID-19 ang mga boatmen nga maoy mokuyog sa mosuroy nga mga turista human kini mapaubos sa swab test.
Human sa swab test isyuhan og ID ang mga boatmen aron magmatuod nga negatibo sila sa COVID-19 ug mamahimo na silang mokuyog sa mga turista sa ilang pagahimoon nga pagsuroy.
Gitataw ni Mayor Chan nga ang kaanindot ug ang limpiyo nga kadagatan maoy ikapasigarbo sa mga Oponganon alang sa mga turista ug maoy hinungdan nga ipahigayon ang coastal clean-up.
“Mao man gyud ning atong puhonan, ang crystal blue waters ug ang atong white sand mao nang mopahigayon kita og coastal clean-up,” ni Mayor Chan pa sa iyang pamahayag.
Nunot niini iyang gipahibalo ngadto sa tanan nga higpit na nga gidili ang pagpangabang og “snorkel” nga maoy naandan nga himoon.
“So tourists will either bring their own or buy brand new snorkels. Motor bancas, however, will have snorkels for sale.” /MEL (BANATNEWS)