Karsada sa Consolacion gireklamo, Mayor mipasalig nga mo-aksyon

CEBU, Philippines — Gireklamo sa mga residente sa barangay Danglag sa Lungsod sa Consolacion ang usa ka sitio sa ilang dapit nga nahimo na nilang problema sukad nisugod na ang ting-uwan

Ang dalan padulong sa sitio Kalabasa, maoy gireklamo sa pipila ka mga residente tungod kay dali ra kini bahaan ug ang tubig moabot pa sa hawak kun adunay ulan.

“Ang problema man gud ana mao ra na sya ang area nga tanan moagi, ang sakyanan in case of emergency mao nay problema kung naay masakit or sunog ang access ani kana ra sya nga agianan nga makaagi ang sakyanan” matod sa usa ka concern citizen nga nihangyo nga dili magpahingalan.

Matod pa sa maong citizen ka lima na siya nagbalik balik sa munisipyo sukad niadtong Agosto 4 apan walay aksyon nga gihimo ang LGU sa Consolacion.

Matod niya luoy ang mga mag-uuma sa maong dapit tungod kay ang baha moabot didto sa ilang pananom nga utanon.

Ang mga residente nilusad og signature campaign pag-awhag sa LGU nga sulbaron ang problema sa maong dalan kon diin di momenus 70 na ang nipirma.

Si Mayor Joannes Alegado nagkanayon nga nasayod na siya sa maong suliran pinaagi sa social media tungod kay wa may niadto sa iyang buhatan aron pag-report sa maong problema.  Gipasusi na sa Mayor ang maong lugar sa Engineering’s Office ug local disaster team ug nakigtigum na usab si Mayor Alegado sa mga hingtungdan. 

 “Naa ba nay drainage daan, kinsay tag-iya ana, pribado ba na sya publiko ba na sya so kana ato na sutaon sa” matod ni Alegado.

“Ato na sya dunggon ug ato sad na sya aksyonan” saad ni Alegado.  /MEL (BANATNEWS)