Sen. Cayetano nihatag og mga biseklita sa frontliners
CEBU, Philippines — Gipahigayon kagahapon sa buntag ang turnover sa 10 ka biseklita ngadto sa kagamhanan sa Siyudad sa Sugbo gikan kang Senador Pia Cayetano alang sa mga frontliners.
Matud ni Konsehal Phillip Zafra nga nakita sa nasudnong kagamhanan ang paningkamot sa siyudad batok sa coronavirus disease 2019 hinungdan nga gihatagan og pagtagad ang mga frontliners tungod sa limitado nga publikong transportasyon.
Sigun ni Zafra nga ang nahatagan sa maong mga biseklita ang nagkalain-laing buhatan sa kagamhanan sa siyudad nga nitabang sa pag-atiman sa mga pasyente sa COVID-19.
Si Mayor Edgardo Labella nagpasalamat sa gihatag nga tabang ingon man sa pagpakabana ni Cayetano sa mga frontliners sa siyudad.
“Salamat kaayo Senator Pia Cayetano, you’ve always consistent in looking after the welfare of the Cebuanos in the City of Cebu just like Speaker Cayetano,” matud ni Labella.
Lakip sa nagpasalamat ang mga frontliners nga nakadawat sa maong mga biseklita tungod kay giila ang ilang gihimo alang sa kaayuhan sa komunidad. /GMR (BANATNEWS)
- Latest