Telco gihangyo sa probinsya nga tarongon ang signal sa Camotes
CEBU, Philippines — Giawhag sa Probinsya sa Sugbo ang mga telecommunication companies nga palambuon ang ilang serbisyo didto sa isla sa Camotes.
Gawas sa problema sa kuryente apil usab nga suliran sa mga tawo didto sa isla ang cellphone signal tungod kay adunay mga lugar nga walay moabot nga signal.
Ang Isla sa Camotes mao ni ang usa sa mga suroyanan sa Probinsya sa Sugbo hinungdan nga importante ang komunikasyon dili lang sa pag promote sa mga tourism sites apil na usab sa pagkontak sa mga bisita o personal nga transakyon nga kinahanglan himoon samtang gabakasyon.
‹›Ang atong number one problem ang communication like internet connection, landline kay mostly naa guest maski asa sila moabot mokatkat na sa lubi kay mostly sa mobakasyon naay business sa ilaha›› matod sa usa sa mga tour operators sa isla sa report sa Sugbo News.
Atol sa pakigtigom ni Gobernador Gwendolyn Garcia sa mga tourism stakeholders ug operators sa isla sa Camotes niadtong Agosto 8, mao kini ang gipadangat nga concern sa mga operators.
Kagahapon nakigtigom si Garcia sa mga representante sa telecommunication companies kon diin nihatag ang gobernador og usa ka buwan aron nga ma-upgrade ang sistema sa signal didto sa isla.
Si Jimmy Chua ang AVP Head sa PLDT Enterprises Visayas mipasalig nga susihon ang maong problema .
‹›Among i-check ang mga sites didto ug unsay mahimo nga upgrading kay naka fiber naman na among mga cell sites gamay na lang buhaton para mo kusog-kusog ang signal›› matod ni Chua. Ang Smart adunay siyam (9) nga tower o cell sites didto sa Camotes. /MEL (BANATNEWS)
- Latest
