117 ka tawo nga na-stranded sa Palawan nakauli na sa Olango

CEBU, Philippines — Nipadayag og kahinangop ang 117 ka tawo kinsa kadaghanan  kanila mga mananagat nga molupyo sa Isla sa Olango, Dakbayan sa Lapu-Lapu dihang hingpit na sila nga nakapauli sa ilang tagsa-tagsa ka panimalay niadtong Sabado human sa ilang pagka-stranded didto sa Probinsiya sa Palawan dihang gipatuman ang lockdown.

Si  Mayor  Junard  Ahong Chan sa post sa iyang facebook page nagkanayon nga ang 117  ka na-stranded nga indibidwal kabahin sa 400 ka mananagat nga naabtan sa pagpatuman sa lockdown sa Visayas ug Luzon.

“Kabahin sila sa 400 ka mga indibidwal nga na-stranded sa maong lugar ug tulo ka adlaw silang naglawig pabalik sa atong siyudad” tipik sa post ni Chan diha sa iyang facebook page.

Matud ni Chan nga ang tanan  nga 117  ka tawo nga nangabot sa Isla sa Olango gikan kini sa Palawan ug gipaubos  sa swab test ug rapid anti-body test sa pagsuta sa ilang panglawas  kon luwas ba sila sa covid-19.

Nunot sa pagsusi sa kahimtang  sa ilang panglawas gihimo sa kagamhanan sa maong dakbayhan  ang paghatag kanila og impormasyon alang sa pagpabilin kanila nga luwas covid-19. /BDB (BANATNEWS)