CEBU, Philippines — Gitinguha sa kagamhanan sa Dakbayan sa Lapu-Lapu ang pagpangapod-apod og “angkas card” aron pagseguro nga kadto lang sakop sa pamilya sa drayber sa motorsiklo ang angkas niini.
Si Mayor Junard “Ahong” Chan nipasabot nga gihan-ay na nila ang maong pamaagi niadto pang Mayo dihang gipadangat nila ang hangyo nga tugutan ang angkas sa motorsiklo sa sakop lang sa pamilya.
Matud ni Chan nga ilang gipaabot ang luwatan nga guidelines sa Department of Transportation (DOTr) sanglit nangayo na man usab niini ang buhatan sa Land Transportation Office (LTO) nga mao usab unya ang mahimong sumbanan sa pag-angkas sa motorsiklo.
Gitataw ni Chan nga sa ilang gihan-ay nga pamaagi ilang awhagon ang tag-iya og motorsiklo nga mo-fill up og application form pinaagi sa online ug ipatapot ang kopya sa marriage contract sa asawa nga moangkas, birth certificate sa anak o picture sa drayber sa motorsiklo kauban sa kapuyo o iyang hinigugma nga moangkas.
Si Chan niingon nga higpit gihapon nga sundon ang health protocol sa paglikay sa pagtakboy sa coronavirus disease 2019 sama sa pagsul-ob kanunay og face mask sa magtiayon o anak nga mag-angkas.
Dugang pa ni Chan nga nunot sa ilang tinguha nga mapatuman ang social distancing, maoy ilang pagahimoon ang pagtakda og adlaw sa aplikante sa “angkas card” alang sa pagkuha niini sa City Hall. /GMR (BANATNEWS)