Mga kawani sa mandaue makadawat sa ilang hazard pay
CEBU, Philippines — Makadawat na sa ilang hazard pay ang mga kawani sa kagamhanan sa Dakbayan sa Mandaue kinsa padayon sa ilang trabaho bisan ubos sa enhanced community quarantine (ECQ).
Moabot sa P200 matag adlaw ang madawat sa mga kawani nga padayong nagtrabaho sukad niadtong Marso 30, 2020.
Nasayran pinaagi sa advisory nga gi-post sa facebook sa Public Information Office (PIO) sa syudad nga modawat sa maong benepisyo ang tanan nga mga kawani nga regular, contractual ug mga job order personnel nga nagserbisyo bisan sa panahon sa pandemic.
“Gitan-aw kini nga dakong tabang labi na niadtong mga empleyado nga mao gayod ang nahimong frontliner sa gubat batok sa COVID-19,” dugang sa maong advisory,
Gipirmahan ni Mandaue City Mayor Jonas Cortes niadtong Lunes Hulyo 6, 2020 ang City Ordinance No. 15-2020 – 1552 “ nga naghatag og COVID-19 hazard pay ngadto sa mga kawani sa city hall nga physically nagpadayon sa iyang trabaho sukad niadtong Marso 30 hangtod sa Mayo 31, 2020.
Giaprobahan sa konseho atol sa regular session ang maong ordinansa niadtong Hunyo 24, 2020 ug hingpit usab kining giaprobahan sa mayor niadtong Lunes Hulyo 6, 2020. /MEL (BANATNEWS)
- Latest