CEBU, Philippines — Mihatag ang Office of the Vice President ug libreng shuttles alang sa mga frontliners ug healthcare workers sa dakbayan sa sugbo nga nagpabiling gipaubos sa enhanced community quarantine ECQ..
Ang maong lakang sa bise presidente maoy kabahin sa gipatuman nga COVID-19 Response Operations in Cebu nga gitawag ug Bayanihan Sugbuanon.
Mismo si Vice President Leni Robredo ang mipahibalo pinaagi sa iyang facebook page sa libreng sakay nga gisugdan kagahapong adlawa Hulyo 6, 2020.
“The OVP Free Shuttle Service for Cebu frontliners starts today! Our buses have served their first trip along our initial three routes early this morning. More trips are ahead, following this schedule” pagbasa sa facebook post ni Robredo.
Ang mga rota naglangkob sa North, South ug Cebu City.
Gitug-an ni Robredo, ang pilot run magsugod una sa tulo ka rota nga adunay duha ka mga biyahe buntag ug hapon.
Hinoon gipasabot ni Robredo nga ang skedyul sa rota mamahimo pa nga mausab depende sa panginahanglan nga makita atol sa gilusad nga pilot run. /MEL (BANATNEWS)