CEBU, Philippines — Gumikan sa nagpadayon nga pagsaka sa gidaghanon sa kaso sa coronavirus disease 2019, nimando si Lapu-Lapu City Mayor Junard “Ahong” Chan sa pagsirado sa City Hall ugma.
Kini aron pagpahigayon sa disinfection sa nagkalainlaing buhatan sa kagamhanan.
Gitataw ni Chan nga ang maong adlaw usa ka regular working day alang sa mga kawani hinungdan nga ang tanan kinahanglan motungha sa ilang trabaho alang sa pagpanglimpyo ug walay transaksyon. Giawhag ni Chan ang mga kawani sa matag buhatan nga maoy mohimo sa disinfection sanglit gitugot ngadto kanila ang pagpalit og mga kagamitan sama sa bleaching ug uban pa.
Ang mga personnel sa City Disaster Risk Reduction and Management Office ang gitahasan lang sa pagpahigayon og disinfection sa palibot sama sa lobby ug mga hagdanan sa City Hall. /GMR (BANATNEWS)