CEBU, Philippines — Usa ka Special Investigation Task Group(SITG) ang giumol aron pagtutok sa kaso sa pagpatay sa retiradong polis diha atubangan sa ilang panimalay sa Brgy. Kalunasan sa Dakbayan sa Sugbo niadtong Huwebes sa buntag.
Si Cebu City Police Office Director Police Colonel Josefino Ligan mimando sa Station Commander sa Police Station 9 pagumol niini aron sila matabangan sa nagkalain-laing units sa kapulisan sa siyudad pagimbestigar sa pagapat kang Retired Police Staff Sergeant Brazilio Borinaga.
“The Police Office will help in the investigation on the death of Police Staff Sergeant Borinaga,” sigon ni Col. Ligan.
Daghan og anggulo nga gitan-aw ang kapulisan labot sa kamatayon ni Borinaga apan si Ligan miingon nga gipalawman pa nila ang imbestigasyon nga gihimo.
Asoy sab ni Ligan nga dunay report nga giingong nalambigit matod pa sa illegal nga drugas ang maong retiradong pulis ug usa kini sa ilahang tan-awon sa imbestigasyon.
“Akong nahibaw-an taud-taod na na-ambush pud kuno ni siya, I still have to confirm that report kung tinuod ba gyud,” ni Ligan pa.
Padayon pa sab sila nangita og testigo nga posibleng nakakita sa krimen ug makatabang sa pagila sa mamumuno. Lakip sab sa tan-awon sa imbestigasyon nga gihimo kun duna bay nadawat nga hulga sa kinabuhi ang maong kanhi pulis ingon man ang pamilya niini. /IBM (BANATNEWS)