P43 milyones shabu nasakmit didto sa Bohol

CEBU, Philippines — Gipresentar sa Police Regional Office 7 ang mokabat ngadto sa kapin P48 milyones nga kantidad sa unom ka kilong gidudahang shabu nga nasakmit sa mga sakop sa Bohol Provincial Police Office (BPPO) sa Probinsya sa Sugbo.

Ang operasyon miresulta sab sa pagkasikop sa lima ka mga High Value Individual sa maong probinsya nga silang Lelit Sinugbojan, 44, taga Dakbayan sa Lapu-lapu; Chellomae Pescura Curayag, 34, taga Inabanga; Junalyn Abelgas Matora, 33; taga Dauis ug Humprey Millana Cenabe, 33, taga lungsod sa Inabanga.

Matud ni BPPO Provincial Chief Police Colonel Joselito Carlito nga unang nakuha mao ang duha ka kilong drugas didto sa Dakbayan sa Talisay ug gisundan kini sa followup operation sa Purok 2, Brgy. Tanghaligi sa Talibon nga mi resulta sa pagka sikop ni Jaime Auxtero Dajao 44, kinsa nakuhaan og upat ka kilong gituohang shabu nga mobalor kini sa P27.2 milyones.

Si PRO7 Director Police Brigadier General Albert Ferro mimando sa mga sakop pagsubay kun adunay drug group nga nagpadagan sa ilegal nga drugas gikan sa Cebu ngadto sa Bohol.

Dugang ni Ferro nga ang mga nasakmit gikan sa usa ka drug triad nga nag supply sa Pilipinas tungod sa pamaagi sa pagputos niini nga gisulod sa usa ka tea bag ga sama sa nakuha sa mga anti-drug operations sa Cebu ug sa kaulohan. Si Clarito miingon nga sa unang duha ka semana paglingkod niya BPPO una kining higayon nga nakakuha sila og unom ka kilong shabu sa probinsya.

Sa laing anti-drug operations, P3 milyones nga balor sa marijuana ang nalarot sa Cebu Provincial Police Office (CPPO) didto sa Barangay Langosig Dakbayan sa Danao.

Ang joint operation gihimo sa Danao City Police Station, Cebu Provincial Intelligence Branch (PIB), Provincial Drug Enforcement Unit (PDEU) ug Philippine Drug Enforcement Agency (PDEA) 7.

Matud ni Police Colonel Roderick Mariano kapin sa 7 mil ka punoang marijuana ang nakuha sa kapolisan ug nasikop usab ang mga nagtanom nga giila nga silang Ariel De Leon Lawas, 23, ug Jeaven De Leon Lawas,20, nagpuyo sa maong dapit. Samtang sa Cebu City, P340 mil nga balor sa gidudahang shabu ang nasakmit sa mga sakop sa  Philippine Drug Enforcement Agency-7 atol sa buy bust operation sa may Magallanes Street, Barangay Ermita.

Ang nasikop mao si Romil Lopez, taga Barangay Bato sa maong barangay ug nakuhaan siya og 50 gramos nga gituohang shabu, buy bust money ug usa ka cellphone. Rowena Capistrano/IBM (BANATNEWS)